Tá Rókur av Fløtum Jespersen flutti til Danmarkar at lesa í 2007, segði hann samstundis farvæl við fleiri fótbóltsupplivingar. Onkrar hevur hann tó fingið, tá hann hevur spælt við HB í summarfrítíðunum, har hann eisini hevur spælt altjóða dystir og skotið mál. Men Rókur segði farvæl við landsliðið, sum hann var vorðin partur av júst tá. Framrættaði HB-arni spældi við í dystinum móti Frankaríki tað árið, umframt eisini í venjingardystinum í móti Íslandi. Men fleiri landsdystir gjørdist tað ikki talan um tá, tí Rókur raðfesti lesnaðin. Nú er líkt til, at framrættaði HB-arin fær eitt plástur upp á sárið, nú liðið skal dystast við BK Frem.
– At fáa henda møguleikan við ÍF Føroyum er ótrúliga stuttligt. Frem er eitt felag við eini ríkari søgu, og við einum tiltiknum loyalum fjepparaskara. Haraftrat hevur liðið fylgt nógv í føroysku fjølmiðlunum seinastu árini, og tað ger tað heila meiri spennandi hjá okkum, heldur Rókur av Fløtum Jespersen.
At talan er um eina ovurhondsstóra uppgávu, er eingin ivi um. Talan er um steypadyst, sum merkir, at tapir tú, so ert tú úti.
– Vit skulu spæla øll okkara kort heilt ótrúliga væl, um vit skulu hava nakran livandi kjans, sigur Rókur av Fløtum Jespersen.
Vónar at fáa stuðul
Royndasti leikarin hjá ÍF Føroyum heldur kortini ikki, at liðfelagar hansara hava nakað at óttast. Heldur ikki stóru áskoðarafjøldina, sum møguliga verður til staðar á Valby Idrætspark í annaðkvøld.
– Tað er óhoyrt, at eitt lið í hesi deildini hevur nógvar hundrað áskoðarar til dystir sínar. Men tað hevur bara postiva ávirkan, eisini hjá okkum, tí vit skulu bara njóta tann stemningin, hetta skapar, ger Rókur greitt. Hann leggur tó aftrat, at hann vónar, at fleiri føroyingar í Keypmannahavn koma at stuðla ÍF Føroyum í samband við stóru avbjóðingina.
