Í einum uppslag á sosiala miðlinum X hevur svenski forsætisráðharrin, Ulf Kristersson, svarað aftur hørðum atfinningum frá ungarska forsætisráðharranum, Viktor Orbán.
Mánadagin fanst Orbán at svenska rættarsamfelagnum í einum innleggi á X fyri at vera á veg til "kollaps".
Teir báðir ríkisleiðararnir hava fleiri ferðir skift orð á sosialu miðlunum síðani, og nú hevur svenski forsætisráðharrin skrivað eitt longri bræv til sín ungarska starvsfelaga.
Ulf Kristersson skrivar millum annað í svari sínum, at Svøríki verður ikki partur av valstríðnum hjá Viktor Orbán.
- Eg skilji væl, at valstríð er í tykkara landi, og at tit hesaferð veruliga verða avbjóðaðar um valdið. Men vit blanda okkum ikki í tykkara valstríð, og vit vilja ikki vera partur av tí, stendur í uppslagnum.
Ósemjan millum báðar ríkisleiðararnar byrjaði mánadagin, tá Viktor Orbán deildi eitt video á X við hørðum atfinningum at svensku rættarskipanini.
- Eitt land, sum einaferð var kent fyri skil og trygd, er nú farin at kolla. Svenska fólkið hevur uppiborið betri, segði ungarski leiðarin.
Orbán vísti til eina grein frá Die Welt, sum sambært honum lýsti, at 280 ungar svenskar gentur vóru handtiknar fyri dráp.
Ulf Kristersson svaraði mánadagin á X, har hann afturvísti kritikkinum hjá Orbán.
- Hetta eru skandaløsar lygnir. Ikki undarligt, tá tað kemur frá manninum, sum avmonterar rættarsamfelagið í egnum landi, segði Kristersson mánadagin.
AFP skrivar mikudagin, at søgan, sum Viktor Orbán vísir á, stavar frá sjálvum AFP.
Her váttaðu svenskir myndugleikar fyri tíðindastovuni, at 280 gentur millum 15 og 17 ár vóru skuldsettar fyri dráp ella onnur harðlig brotsverk.
Bert 4 av teimum 280 vóru tó skuldsettar fyri morð. Hinar ákærurnar vóru í sambandi við onnur harðlig brotsverk, skrivar AFP.
/Ritzau/
