Seinasta vikuskifti vóru Ester Gaard Hansen og Heidi Andreasen í Hálandi, har tær báðar luttóku í stóru kappingini, Double Dutch Open.
Við á ferðini var eisini venjari teirra, fyrrverandi gullfiskurin, Katrin Johansen, sum í síni tíð førdi mong heiðursmerki heim til Føroya.
Góð úrslit
Fleiri enn 200 svimjarar úr átta ymsum tjóðum luttóku í kappingini, men hetta merkti ikki, at uppgávan gjørdist ov møtumikil hjá føroysku svimjarunum.
Báðar luttóku tær í 6 ymsum kappingum hvør, og tá avtornaði, høvdu tær báðar staðið seg sera væl.
Ester Gaard Hansen vann silvurmerki í 200 metra blandaðari svimjing, og harumframt vann hon bronsumerki í bæði 400 metra frí- og 100 metra bringusvimjing.
Heidi gjørdi eisini um seg í kappingini, og megnaði hon at vinna sær bronsumerki á teininum, 100 metra ryggsvimjing.
Til Sydney
Kappingin í Hálandi var liður í fyrireikingunum til Paraolympisku leikirnar, sum verða hildnir í Sydney í heyst.
Føroysku svimjigenturnar hava longu tryggjað sær luttøku á leikunum, tí higartil hava tær megnað at svomið undir kravtíðunum á fleiri av teimum teinum, sum tá standa á skránni.
