Svøríki væntar, at hóttanin frá Russlandi fer at økjast.
Tað boðaði svenska fregnartænastan Säpo frá á tíðindafundi.
– Tað er týdningarmikið, at Svøríki sum samfelag heldur seg á varðhaldi, sigur leiðarin í Säpo, Charlotte von Essen, á tíðindafundinum.
Sambært Säpo er Russland vorðið meira váðafúst, og tað ávarar millum annað um, at Russland kann fremja sabotasju móti Svøríki.
Säpo hevur seinasta árið kannað fleiri mál um illgruna um sabotasju, men einki hevur verið knýtt at útlendskum valdi.
Hóast fregnartænastan metir Russland vera størstu hóttanina móti Svøríki í løtuni, so metir hon eisini, at Kina er størsta hóttanin í longdini, tá talan er um búskaparligu trygdina hjá Svøríki.
Samstundis metir Säpo sambært tíðindastovuni Reuters, at kríggið í Iran hevur økt um vandan móti amerikanskum, ísraelskum og jødiskum málum í Svøríki. Sambært miðlinum SVT er Svøríki sum land ikki fremsta fokus í møguligu álopunum.
Eins og í hóttanarmetingini fyri 2025 eru Russland, Kina og Iran mett sum størstu hóttanir móti Svøríki sambært frágreiðingini hjá Säpo.
Men í frágreiðingini stendur eisini, at fleiri lond eru við í "trygdarhóttandi virksemi". Hetta fevnir um "fregnartænastuvirksemi, loyniligt og avnoktandi ávirkansvirksemi og net-álop".
Á tíðindafundinum kallar Charlotte von Essen reglugrundaðu heimsskipanina "avbjóðaða og ristin".
Säpo metir, at menningin av hóttanini móti Svøríki sum heild fer at halda fram í versnandi ætlan næstu árini.
Yvirgangshóttanarstøðið í Svøríki verður framvegis væntandi trý av fimm. Hetta merkir, at hóttanin framvegis er á einum hækkaðum støði, men hon er lægri enn hon var í byrjanini av 2025, tá hon var fýra. Tað varð lækkað niður í trý í mai.
Í tíðindaskrivi skrivar Säpo, at tørvur er á at "styrkja mótstøðuførið hjá Svøríki". Í henni lýsir fregnartænastan, at umfatandi arbeiði longu er í gongd við framhaldandi at byggja upp hernaðarliga og sivila verjuna.
– Tað er trupult at ávirka hóttanina, men vit kunnu heilt sikkurt ávirka verjuna. Hetta er serliga galdandi fyri trygdina hjá starvsfólki. Ein insider í einum trygdarviðkvæmum felag kann elva til stóran skaða.
– Sum tjóðartrygdartænasta noyðast vit tí at handla harðliga, tá illgruni er um njósning, sigur Charlotte von Essen í tíðindaskrivi.
/Ritzau/
