Nú byrjar formliga arbeiðið at innlima Svøríki og Finnland í NATO felagsskapin.
Tað hendir, eftir at øll 30 limalondini í NATO hava skrivað undir, at tey bæði norðurlondini kunnu gerast partur av verjusamgonguni.
Hesum boðaði Jens Stoltenberg, NATO aðalskrivari, frá á fundi í Brússel í dag.
– Hetta er ein góður dagur fyri Svøríki og Finnlandi, segði Jens Stoltenberg sambært Ritzau.
– Við 32 londum kring borðið koma vit at verða enn sterkari, og fólkið í londunum verða enn tryggari, segði hann.
Tað ganga væntandi fleiri mánaðir, áðrenn øll formlig viðurskifti eru avgreidd við limaskapinum hjá Svøríki og Finnlandi. Limaskapurin skal endaliga góðkennast bæði í londunum og í NATO.
