Fótbóltur
Tað var í heyst ivasamt, um Tórður Thomsen skuldi halda fram í málinum hjá NSÍ, ella um hann skuldi royna eydnuna í Danmark, har hann segðist hava møguleika fyri sáttmála við Vejle í bestu deildini.
Leiðslan í NSÍ bant tí um heilan fingur, og í desember mánaði skrivaðu teir sáttmála við Meinhardt Joensen, sum verður fyrsti-málverji hjá NSÍ í 2009.
Samstundis hevur tað drigið út hjá Tórði Thomsen at fáa nakran sáttmála í Danmark. Men hann sigur kortini, at hann mest sannlíkt ikki verður í Føroyum komandi kappingarárið.
- Sum tað sær út, so verður tað uttan fyri Føroyar. Enn veit eg ikki akkurát, hvar tað verður, men tað er so ætlanin.
Og tú ert kanska í samband við okkurt felag, har tú møguliga skal spæla í ár?
- Ja. Og sjálvur vóni eg, at okkurt hendir innan fyri næstu tvær vikurnar. Eg fái ikki sagt nakað um, hvar tað verður, men tað skuldi gjarna verið á einum hampuligum støði, sigur Tórður Thomsen.
