Kappingin er bara tvey umfør gomul, og fótbóltsfepurin í Klaksvík er longu høgur. Í gjár fór KÍ um Suðuroyarfjørð, og fleiri fjepparar úr Klaksvík eru við í Suðuroy, har fyrsta bríksl við Stórá í Trongisvági verður klokkan 16.
Meðan TB einki stig hevur vunnið í tveimum teimum fyrstu umførunum, so hevur KÍ fulla úrtøku. Hjá TB eru fleiri spælarar skaddir. Talan er um Mark Kongsted (1 vika), Musah Armah (2 mánaðir), Rógvi Joensen (3 vikur) og Einar Thorsteinsson (1 vika). Teimum er stórur saknur í, tí teir eru ikki so nógvir, sum kappast um plássini á besta liðnum.
Øðrvísi er tað í KÍ. Har eru allir spælararnir tøkir, og teir eru so mikið nógvir, at tað er kapping um øll plássini á liðnum. Í gjárkvøldið var verjuspælarin Jesper Brinck á næstbesta liðnum, sum tapti 1-0 á Skála.
Tað er eisini kapping um plássið millum stólparnar. Kristian Joensen hevur higartil í ár vart málið. Nýggjur málverji er 27 ára gamli Mathias Rosenørn úr Danmark. Hann vardi málið á næstbesta liðnum síðsta vikuskifti, tá ið FC Suðuroy vann 2-0 í Klaksvík. Í gjárkvøldið var hann ikki á næstbesta liðnum. Tað kundi boðað frá, at venjarin umhugsar møguleikan at royna nýggja málverjan á besta liðnum.
Søgan sigur, at dysturin á Sevmýri og seinnu árini í Trongisvági hevur altíð kenst klaksvíkingum ikki serliga álvuligur. Í fjør vann KÍ fyrra dystin í Trongisvági 2-1. Sigursmálið varð skorað við brotssparki í 95. minutti. Seinni dysturin hjá KÍ í Trongisvági, sum var spældur leygardagin 19. september, tá KÍ var á veg av landinum í Europaørindum, endaði málleysur.
-Vit kenna søguna, og vit vita, at tað altíð og ikki minst ímóti TB og í Trongisvági er neyðugt at vera fult og heilt fokuseraður. Tað ætla vit okkum at vera, sigur KÍ liðformaðurin Jákup B. Andreasen.
Eftir tveir dystir á útivølli eigur TB í dag fyri fyrstu ferð í ár heimavøll. Í Fuglafirði skoraði TB ársins fyrsta mál. Tað hevði verið kærkomið at vunnið ársins fyrsta sigur ella ársins fyrsta stig ímóti KÍ.
TB - KÍ: Bjarki Danielsen kl. 16.00.
