Keypir tú jólagávur?
- Ja, eg keypi fleiri jólagávur.
Jan Erlingsson Petersen sigur, at familjan hevur hildið jólini heima við hús í Leirvík. Seks fólk eru í húsi, og so komu verforeldrini eisini. Jólaaftan verður hildin við góðum frokosti, og jóladøgurðin um kvøldið var dunna við tilhoyri.
- Tá døgurðin var etin, og pakkarnir vóru pakkaðir upp, var tað hugni fyri kvøldið.
Hvat var tað besta sum hendi í 2019?
- Tað besta man vera, tá vit gjørdu fyrstu fiskapylsurnar í Knettahúsinum, eftir at virksemið hevði ligið stilt vegna umbygging í einar tríggjar mánaðir.
Og hvat var tað keðiligasta?
- Keðiligasta hendingin var helst, tá eg koppaði um og endaði nakrar dagar á Landssjúkrahúsinum... og so tíðin eftir innleggingina. Hetta var ein hvøkkur, ásannar Jan Erlingsson Petersen.
Hvønn týdning hava jólini fyri teg?
- Jólini hava sera stóran týdning fyri meg, fyrst og fremst andaliga, tí vit hátíðarhalda, at Jesus frelsarin varð føddur í heimin.
Hann heldur, at tað eisini passar væl til hesa myrku tíð av árinum at tendra ljós, hugna sær og gleða hvønn annan við bakstri, gávum og á annan hátt.
- Jólini eru sum heild sera týðandi og eftir mínum tykki ein góð tíð á árinum, sigur Jan Erlingsson Petersen, sum eisini ynskir øllum Føroya fólki eini gleðilig jól og eitt av Harranum signað nýggjár.
