Tað vísir seg at vera ringt at fáa útlendskar serlæknar at søkja starv á Landssjúkrahúsinum. Og tað vísir seg at vera næstan hopleyst at fáa nakran serlækna í eldrasjúku, at koma til Føroyar.
Tað sigur Kaj Leo Holm Johannesen, landsstýrismaður í heilsumálum. Tordur Niclasen, sum hevur hevur havt sæti á Løgtingi fyri Miðflokkin, hevur spurt hann, hvussu tað gongur at fáa ein serlækna í geriatri, ella eldrasjúkum, til Føroya.
Landsstýrismaðurin sigur at Landssjúkrahúsið hevur játtan til serlækna í eldrasjúkum í hálva tíð. Í 2015 varð ein serlækni í eldrasjúkum á Landssjúkrahúsinum í nakrar mánaðir, men síðani hevur eingin verið Hann sigur, at sum heild er tað ringt at fáa serlæknar í fast starv, og tað er uppaftur verri at fáa fatur á einum serlækna í eldrasjúkum.
Í Sjúkrahúsverkinum vita tey ikki um nakran føroying, ið er serlækni í eldrasjúkum, og tað hevur víst seg at verða nærum vónleyst at fáa nakran serlækna at søkja eitt starv á økinum í Føroyum, sigur hann. Men hann leggur afturat, at sjúkrahúsverkið fer at gera eina nýggja roynd í næstum, tá ið tey fara at lýsa eftir einum serlækna í eldrasjúkum. Landssjúkrahúsið samskiftir eisini við sjúkrahús um at vera við í útbúgvingarstørvum í eldrasjúkum, soleiðis at ein lækni kann fara undir útbúgving í eldrasjúkum á Landssjúkrahúsinum, og so gera seg lidnan í Danmark.
Sum heild er tað ringt at fáa yngri læknar at útbúgva seg til serlækna í eldrasjúkum – og so er útlitini til at arbeiða sum einsamallur serlækni í eldrasjúkum í Føroyum, ikki lokkandi.
– Sostatt ber ikki til at siga, nær vit fáa serlækna í eldrasjúkum, men arbeitt verður við málinum, sigur Kaj Leo Holm Johannesen.
