Hesi bæði nýggju yrkingasøvnini eru ein blandingur av yrkingum, tekningum og av list.
Óla Jákup hevur fyrst fingið íblástur til yrkingarnar, sum síðani eru sendar bróðrinum í Keypmannahavn. Og her hevur hesin so "prýtt" tær við tekningum sínum.
Í savninum eru 55 yrkingar og av hesum hava tær 32 fingið ein tekning við - tær allar flestu í litum.
Yrkingarnar í hesum báðum søvnunum fevna um eitt tíðarskeið uppá umleið 14 mánaðir.
- Viðhvørt eru yrkingarnar bara har, sigur Óla Jákup um hesar. Tá ræður bara um at hava ein góðan griffil uppi á sær, leggur hann brosandi aftrat.
Alskyns evni verða tikin upp í hesum yrkingum: Frá eini troyggju sum verður vaskað til delfinir sum sóla sær, og frá teirri fornu roykstovuni til nýhugsan.
Ferðast verður víða, - allan vegin til Alaska, Filipsoyggjarnar, Galapagos, Ísland og Angola. Tónleikur, sjólívið og framtíðin eru eisini við.
Tað er Estra í Gøtu sum hevur prentað bókina, sum forlagið Stjørnustøv gevur út.
