Eftir at hava gjørt kanningararbeiði - eisini við hjálp frá serfrøðingum úr Danmark - sigur Grønlands Politi, at talan helst er um dráp og sjálvdráp.
Sambært Sermitsiaq er løgreglan fyrrapartin komin við einari dagføring í málinum.
Tað vóru eini hjún, sum vórðu funnin lívleys á adressuni - maðurin 59 og kvinnan 57 ár. Løgreglan heldur ikki, at onnur fólk vóru partur av syrgiligu hendingini í Tasiilaq.
Fyribils kanningarnar vísa, at talan helst er um dráp og sjálvdráp. Grønlands Politi hevur havt hjálp frá kriminalteknikarum og rættarlæknum úr Danmark.
Grønlands Politi leggur aftrat, at kanningararbeiðið í málinum heldur fram, og tí kunnu tey í løtuni ikki siga meira um málið.
- Tey avvarðandi hava fingið boð um fyribilsúrslitið av kanningunum, sigur løgreglan í sínari dagføring fyrrapartin í dag.
