Jóhanna hevur fýra systrar. Tá ein teirra giftist 3. januar segði pápi teirra, at nú átti hann tríggjar Katrin - konuna og tvær abbadøtur. Ein mánað seinni var bara ein teirra eftir.
- Vit hava verið spard fyri alt slíkt í langa tíð, og so hendi hetta, sigur Jóhanna í Króki.
Sorgin var sjálvandi stór, og Jóhanna vildi gera okkurt at minnast mammu sína og systurdóttrina við.
- Eg gjørdi tatoveringina tá eg, systrarnar Sólfríð, Rigmor og pápi vóru í Manchester í summar. Rigmor var mamma til lítlu Katrin, sum doyði, greiður Jóhanna frá.
Tatoveringin er av eini lilju - sum ímyndar mammuna Katrin. Ein lítil ljósareyð stjørna inni í liljuni er ímynd av lítlu didduni. Fimm stórar og fimm lítlar stjørnur eru rundanum liljuna. Tær ímynda børnini hjá systrunum, og pápan og tær fýra systrarnar!
- Tatoveringin merkir sera nógv fyri meg. Hon er ein ímynd av øllum, sum er týdningarmikið í mínum lívi, sigur Jóhanna.
Pápin Petur var við Jóhannu, meðan tatoveringin varð gjørd.
- Hann var sera rørdur.
Hóast at sorgin eftir mammuna og systirdóttrina hevur verið tung, so heldur Jóhanna, at sorgin hevur gjørt hana sterkari.
- Eg síggi meiri virði í lívinum. Nú veit eg, hvussu skjótt tað kann verða liðugt, sigur hon.
Fakta
Navn: Jóhanna í Króki
Aldur: 25 ár
Bústaður: Strendur
Tatoveringar: Tvær
Fyrsta tatoveringin tá eg var: 18 ár
