Í løtuni eru fimm partrolarapør til fiskiskap, og tey flestu koma inn at landa í næstu viku.
- Øll skipini fiska upsa, men fiskiskapurin er smáligur, vita tey á Fiskamarknaði Føroya at siga í dag.
Tvey partrolarapør eru framvegis á gulllaksaveiði, og hetta er helst longsta gulllaksavertíð í nøkur ár.
Ein djúpvatnstrolari er á svartkalvaveiði í bretskum sjógvi. Teir koma helst inn at landa síðst í næstu viku.
Lagt verður aftrat, at ein frystitrolari eisini fiskar svartkalva í Eysturgrønlandi.
- Í løtuni eru tveir trolbátar norðanfyri. Teir fáa mest av hýsu, toski og so nakað av flatfiski.
Sagt verður eisini, at ein trolbátur er á Skeivabanka. Teir fáa mest av havtasku, upsa og longu.
- Allir teir smáu trolbátarnir koma inn at landa í næstu viku.
Tvey garnaskip fiska svartkalva og hava brúkiligan fiskiskap. Tvey fiska havtasku, og her er fiskiskapurin skiftandi.
- Øll garnaskipini koma inn at landa í næstu viku, siga tey á Fiskamarknaði Føroya.
