Tey hava bæði roynt at vinna Prix Føroyar tónleikakappingina sum sangarar, bæði hava fingið góð ummæli í útlandinum, og bæði hava eyðsýndar tónleikaligar dygdir.
Talan er um Eivør Pálsdóttir og Teitur Lassen, sum í kvøld fara at spæla saman á konsert í Norðurlandahúsinum.
Konsertin er partur av Listastevnu Føroya, sum fór av bakkastokkið mikudagin, og Eivør og Teitur skulu í kvøld fyri fyrstu ferð spæla saman á konsert.
Teitur er búsitandi í Danmark, og hann ferðast nógv í útlandinum. Hann leggur alla orku í tónleikaliga arbeiðið, og tað hevur longu borið frukt.
Teitur gjørdi fyri stuttum eina útgávuavtalu við eitt plátufelag í Los Angeles, og hann er eisini sloppin fram at í útlendskum sjónvarpi.
Millum annað hevur Teitur havt tveir sangir hjá sær við í sjónvarpsrøðini »Jack and Jill«, sum Warner Brothers framleiða.
Góð ummæli
Eivør Pálsdóttir er kend sum sangari í rockbólkinum Clickhaze, men hon hevur eisini givið eina solofløgu út, og hon hevur eisini ferðast víða við sínum egna bólki, sum spælir tónleik, sum leggur seg meira á jazz- og popbógvin.
Tá Clickhaze luttók á donskum festivali fyri nøkrum vikum, síðani vóru ummælini av avrikinum hjá Eivør serstakliga góð. Danir halda, at tað er so stórt potentiali í songkvinnuni úr Gøtu, at hon fyrr ella seinni fer at fáa gjøgnumbrot uttan fyri Føroyar.
Sama skoðsmál hevur Teitur eisini fingið, og hann stríðist fyri sínum møguleika í útlandinum.
Men nú verða tey bæði at síggja og hoyra á heimligum palli, og tað verður í kvøld, tá konsertin við teimum verður í høllini í Norðurlandahúsinum kl. 21.00.
