Tær tríggjar kommunurnar rundan um Skálafjørðin, sum samstarva um eldraøki, fara nú at seta eina tørvskanning í verk, fyri at vita, hvussu fólk vilja hava tað á elliseárum.
Tað eru tríggjar kommunur við í hesum samstarvinum, Runavík, Sjógv og Nes og tilsamans búgva eini 6000 fólk í kommununi.
Og tilsamans eru 867 fólk yvir 67 ár í Skálafjarðarsamstarvinum. Í 1985 vóru tey 560 í tali, so talið er nógv hækkað hesi seinastu 30 árini.
Tordur Niclasen, sum tekur við sum leiðari fyri Skálafjarðarsamstarvið tann 1. november, eftir Mary í Garði, sum hevur sagt upp, sigur, at í sambandi við kanningina, fara øll í økinum yvir 67 ár at fáa eitt spurnarblað, fyrst í árinum
Har fáa tey høvi at greiða frá, hvussu tey halda, at eldraøkið skal skipast fyri at veita ta bestu tænastuna til tey eldru.
Samstundis hava tey eisini í hyggju at skipa eitt borgarafelag við umboðum við fólki úr øllum kommununum í samstarvinum.
Hetta borgarafelagið skal fáa høvi til at gera viðmerkingar, áðrenn broytingar verða gjørdar, sum hava stóra ávirkan á tænastustøðið á eldraøkinum.
