Krimiskaldsøgurnar hjá Ian Flemming um hendan ladykiller og nógv drekkandi bohema njósnaran eru endaðar sum bæði kult og kamp, kitsj og modernistisk myta alt í senn.
Aftur til fyrstu bókina
Hetta er hin fyrsta krimiskaldsøgan, ella njósnaraskaldsøgan sum Flemming skrivaði. Við Casino Royale fára vit aftur til byrjanina. Aftur til áðrenn Bond gjørdist njósnari, hvussu hann var fyri svárari hjartasorg. Hetta er eisini søgan um, hvussu hann fær rættin til at drepa.
Vit koma djúpari inn í persónin, estetikaran og playboyin James Bond, sum við eitt fær nøkur eyka lyndiseykenni, ið eru áhugaverd.
Post 9/11
Í nýggja filminum Casino Royale, eru nógv sum hugsa nógv um tey fólkini sum stóðu aftan fyri álopið 11. september 2001 í New York, vóru spekulantar, ið vildu hava at børsurin í New York skuldi fella. Hetta er ein sera realistiskur tanki, ið fregnartænastur kring heimin eisini hava arbeitt við.
Daniel Craig
Nýggi maðurin, sum er farin í leiklutin sum Mr. 007, James Bond er Daniel Craig. Hann varð seinast sæddur í filminum Munchen (2005). Nógv hava verið nógv móti hesum manninum sum 007. Øll hava sína serligu mynd av hesum leikaranum. Nógv halda ikki, at hann er nóg penur, ella at hann er ov gamal (maðurin er 38 ára gamal) o.s.fr. Øll hava okkurt ringt at siga um mannin, ið er farin í dýru klæðini hjá Mr. Bond, men eg haldi at hann er ein hin besti Bond í eini 35-40 ár.
Tað tók hálvtannað ár at finna Daniel Craig. Hann hevur fyrr leika í filmum sum Tomb Rider og Munich. Hann hevur nú eina kontrakt uppá tríggjar Bondfilmar.
Mads Mikkelsen
er Le Chiffre
Fíggindarnir broytast, so hvør so heimsmyndin er broytt, tema í bondfilmunum broytast og fíggindarnir hjá Bond broytast. Fyrr vóru tað Goldfinger, Dr.No, Hugo Drax, Ernst Stavro Blofeld v.m. Hesuferð er tað so danin Mads Mikkelsen, ið vit eina mest kenna sum ein ordans filmsjeik frá Danmark. Hann er annars júst aktuellur við filminum Prag og Efter Bryllupet. Vit kenna hann sum løgnan stavn í Adams Æbler, sum desperatan tapara í Pusher I og II. Sum ein ólekran mann í De Grønne Slaktere. Hann hevur fyrr verið við í enskum filmatiseringum, so sum í filminum I am Dina (2002), sum var ein óvanliga vánaligur filmur. Hann var ein deiliga svakur psykopatur í filminum Blinkende Lygter (2000). Hann hevur verið við í Rejseholdet og í harða filminum Bleeder. Hann kom av álvara fram sum psykopaturin í fyrra Pusher filminum frá 1996.
Í hesum filminum eru vit aftur við byrjanina. Aftur til basic, aftur til hvør er nú hesin Bond? Her skal hann gerðast ”Bond” og Agent 007. Hann skal njósnast og finna út av øllum um yvirgangsmannin Mollaka, hendan operatiónin leiðir hann á sporið á einum altjóða yvirgangsnetverkið hjá hesum Le Chiffre. Hesin Le Chiffre (er sera væl leiktur av Mads Mikkelsen) vaskar pening hvítan fyri yvirgangsfólk. Bond skal oyðileggja ein íløgu, ið Le Chiffre hevur gjørt. Hesin er ein sera kaldur og kyniskur vinnulívsmaður og bakmaður fyri yvirgangsmenn. Hann vil gera eina pokerkapping, við sera høgum vinningum, fyri at vinna pening til yvirgang.
Poker og kvinnur
M (Judy Dench) gevur 007 boð um at fara at spæla poker við Le Chiffre. Eitt pokerspæl á Casino Royale endar við einum spæli um lív og deyða. CIA-agenturin Felix Leiter (Jeffrey Wright) hjálpir Bond her.
Kring hetta pokerspælið eru nógv ymisk fólk, so sum vakrar kvinnur. Tær eita Solange (Catherina Murino), Valenka (Ivana Milicevic), Vesper Lynd (Eva Green). Serliga hendan Vesper, er giftig fyri Bond. Solange er ein desperat gift kona, sum tá hon er saman við Bond tosar ov nógv.
Eg haldi mangan, at tað einki hendir innan hesa actionfilmgenruna, bert gerðast ”special effects” flottari og dýrari. Seinastu árini hava hesir actionleikstjórar tó roynt at givið genruni eitt vet av humor, so sum í 1980inum og í 1990inum við Arnold Schwarzenegger og Bruce Willis, meðan Pierce Brosnan í James Bond virkaði bert meiri og meiri kaldur og idiotiskur. Eg haldi, at hesin Craig er betur enn teir flestu Bondleikarnir eg havi sæð leingi, ja vit skulu aftur til Connery.
Tað sum eg ofta hati mest við James Bond er, at hesir filmar bert eru ein yvirdrivin uppvísing av nørdasligum tøkni og alt snýr seg um tam-arhald, og so verða kvinnur altíð í hesi genruni eitt slag av objektum, ið eru eini 20 ár yngri enn hetjan og síggja hamrandi gott út, men eru ofta antin vandamiklar ella nærum minni ment offur fyri mannligu gyrndina.
Ein kaldur og góður Bond
Actionfilmurin er altíð um at hava tamarhald á øllum, bad guys, kvinnuni og vápnum.
Actionfilmurin er ein hin mest urmytiski filmurin allur sum er, hann er ein lang framvísing av machoetikki.
Hesin Craig kemur tó eitt vet longur enn hinir sum hava spælt Bond í seinastuni. Hesin er ein dreparamaskina við sjarmu og køldum hjarta. Ein luksus njósnari og hesin filmurin er ein betur Bondfilmur enn vit hava sæð teir í 20 ár, tó er hann alt ov langur 145 minuttir er alt ov langt.
Fakta um Casino Royale
USA/Ongland 2006
Leikstjóri: Martin Campbell.
Leikandi:
Mads Mikkelsen, Judi Dench, Daniel Craig, Eva Green, Jeffrey Wright.
Frumframførdur í Havnar Bio hóskvøldið 23. november klokkan 20.45. Loyvdur yvir 11 ár.