Fert tú á ólavsøku í ár?
- Sjálvandi! Eg havi verið á ólavsøku á hvørjum ári síðan 2002.
Tað sigur Anne Mette Greve Klemensen.
Hvussu heldur tú ólavsøku?
- Ólavsøkuaftan plaga vit at fara til setanina við børnunum, spáka í býnum og vitja vinfólk. Ólavsøkudag er programmið merkt av skrúðgongu, gudstænastu og kórsangi.
Anne Mette vísir á, at maðurin fer at stjórna Ólavsøkukórinum í ár, so hann hevur úr at gera við venjing í vikunum uppundir.
Hvat er tað besta við ólavsøkuni?
- Hátíðarløtan ólavsøkumorgun er nakað serligt og annars at syngja. Eg helt ólavsøku eini 10 ár, áðrenn eg bleiv prestur, og hava vit altíð møtst við kórinum og sungið - eisini tá børnini vóru smá.
Er onkur serlig ólavsøka, tú minnist?
- 2017 var árið, tá eg stóð fyri tørni at halda ólavsøkuprædikuna. Tað ger ein vanliga bara eina ferð í lívinum, og tað kendist sum ein ómetaliga stórur heiður at gerast ein lítil liður í einari traditión, ið røkkur fleiri øldir aftur í tíð.
Kundi okkurt verið øðrvísi við ólavsøkuni?
- Tað er ringt at siga. Tíbetur velur ein sjálvur, hvussu ein fer á ólavsøku.
Anne Mette Greve Klemensen sigur, at hon onkuntíð hevur hugsað, at tað er í so dýrt hjá børnum at fara ein túr í býin at stuttleika sær, tí øll hava ikki líka nógvar lummapengar.
- Men annars haldi eg, at ólavsøkan er góð og hóskar akkurát til mín, leggur hon aftrat.
