Í gjárkvøldið høvdu vit her á síðuni eina søgu um eitt møguligt tjóvarí í Bø.

Tað var Gutti Guttesen, grindaformaður, sum á sínum Facebook-vanga fortaldi, at 11 mønustingarar og tveir kúluonglar eru horvnir úr einari smiðju í bygdini.

Sambært grindaformanninum heldur hann ikki, at nakar í bygdini hevði funnið upp á at framt eitt slíkt tjóvarí.

Tí stúrir grindaformaðurin fyri, at tað kunnu vera fólk í umhvørvisfelagsskapi, sum standa aftanfyri tjóvaríið av mønustingarunum og kúluonglunum.

Í morgun váttaði vaktleiðarin á løgreglustøðini, at tað, sum eftir øllum at døma er eitt tjóvarí í Bø, er meldað.

- Málið er júst vorðið meldað, og tí eru vit ongan veg komin við kanningararbeiðnum. Í løtuni hava vit ongan illgruna, sigur løgreglan.

Vaktleiðarin heldur fyri, at hvør skal hava áhuga í at stjala nakrar mønustingarar, tí teir kunnu bara brúkast til tað, teir eru gjørdir til.

Og júst tað sama er við kúluonglunum, sum eisini bara kunnu brúkast til eitt endamál.

- Vit fara at kanna hetta málið, sum eitt hvørt annað mál, men enn er alt ov tíðliga at siga, hvat kann fara at vísa seg, sigur løgreglan.

Lesið eisini:

11 mønustingarar eru horvnir í Bø - https://www.in.fo/news-detail/11-moenustingarar-eru-horvnir-i-boe