Í Danmark hevur verið nógv orðaskifti um ta útlendsku arbeiðsmegina, men kortini heldur ráðharrin Claus Hjort Frederiksen, at Danmark hevur havt gagn av viðurskiftunum.
- Fyri bara fáum árum síðani var tað næstan so, at danir høvdu hug at senda boð eftir herinum, hvørja ferð teir sóu ein póllending arbeiða í Danmark. Soleiðis er tað ikki longur. Vit hava eina heilt aðra uppfatan av teimum fremmandu, tí tey loysa okkara trupulleikar við vantandi arbeiðsmegi, sigur ráðharrin við danska útvarpið.
Ein nýggj frágreiðing, sum er almannakunngjørd í dag, vísir, at alt fleiri fólk úr Póllandi og Baltalondum hava leitað sær til Vesturevropa og Norðurlond at arbeiða, síðani hesi londini komu upp í ES tann 1. mai í 2004. Ella sagt við øðrum orðum hevur arbeiðsmegin í Póllandi og Baltalondum gagnnýtt møguleikan at fara vesturum at arbeiða.
Frágreiðingin kemur til ta niðurstøðu, at arbeiðsmegin úr teimum eysturevropeisku londunum og serstakliga Póllandi og Baltalondum hevur verið medvirkandi til størri búskaparvøkstur í Norðanlondum, samstundis sum tann útlendska arbeiðsmegin eisini hevur gjørt, at inflasjónin í Norðanlondum hevur verið minni, enn hon annars hevði verið.
Eisini ein baksíða
Men eisini hendan medaljan hevur eina baksíðu. At so nógvir póllendingar og baltar eru farnir vesturum at arbeiða síðani 2004, hevur havt við sær, at nú er trot á arbeiðsmegi í teirra egnu londum. Danski arbeiðsmarknaðarráðharrin heldur kortini ikki, at danir skulu hava ringan smakk í munninum.
- Eg eri ikki samdur við teimum, sum siga, at t. d. Pólland hevur trot á arbeiðsmegi, tí so nógvir póllendingar eru farnir av landinum at arbeiða. Hetta er ein trupulleiki, sum Pólland og Baltalond mugu loysa. Satt at siga haldi eg, at tað er ein fyrimunur fyri Pólland, at ein póllendingur kann fara til Danmarkar at arbeiða fyri eina góða løn, og at hann so kann fara heim aftur við pengunum, sigur Claus Hjort Frederiksen við DR.
