Toran og toruljós hava altíð fingið fólk at undrast á margfaldnið í náttúruni, menn enn er kanska okkurt, sum vit ikki vita um hesi fyribrigdi. Fleiri av rúmdarmonnunum, sum hava malið kring Jørðina tey seinastu 40 árini, hava sæð toruljós úr erva, og fleiri teirra hava sagt, at tað tóktist, sum at toruljósini høvdu samband sínamillum, sjálvt um fleiri hundrað kilometrar vóru ímillum teirra.
Spurningurin er so, um tað er so, og tað hava ísraelski professarin Yoar Yair og felagar hansara á Open University í Ísrael nú kannað við upptøkum hjá amerikonsku rúmdarferjuni Columbia.
Í einari grein í tíðarritinum Science skrivar Yoar Yair, at sambært kanningunum er eitt ella annað samband ímillum toruljósini. Spurningurin er, hvat samband talan er um, og teir ísraelsku granskararnir halda, at eitt toruljós sendir elektromagnetiskar bylgjur niður á Jørðina, og at tær verða slongar uppaftur í luftina og elva til toruljós aðrastaðni. Hetta er ikki óhugsandi, sigur Yoar Yair, sum tó viðgongur, at kanningarnar vísa ikki, at eitt toruljós kann elva til eitt annað toruljós fleiri hundrað kilometrar burturi.
- Men kanningar okkara benda á, at eitt ella annað fjalt samband er, skrivar hann í Science.
