Trolarin hjá Royal Greenland, Avataq, hevur nú fyri triðju ferð sett veiðimet.
Mikudagin legði trolarin til Atlantbryggjuna í Nuuk við 1003 tonsum av rækjum eftir at hava verið til fiskiskap í ein mánaða.
Tað skrivar heimasíðan hjá Royal Greenland.
- Hetta er fyrstu ferð í landsins søgu, at ein kvotuvekt á 1.045 tons er veidd á einum og sama túri. Tá rækjurnar eru virkaðar, gevur hetta 1.003 tons.
Tað sigur rakstrarleiðarin í Royal Greenland, Johan Berthelsen.
Sambært heimasíðuni hjá felagnum er hetta triðju ferð, at Avataq setir veiðimet.
Fyrstu ferð var hin 18. mai í 2020, tá lastin ein einstakan túr var á 903 tons. Aðru ferð var hin 6. august í 2020, tá gamla metið varð sligið við 24 tonsum, og hesaferð hevði Avataq 927 tons.
- Trolarin, sum er 82,3 metrar langur og 18 metrar breiður, hevur ein lastakapasitet á 2850 rúmmetrar, upplýsir Royal Greenland.
