Trý fólk hava latið lív og trý eru løstað í russiskum álopi í Zaporizjzja-regiónini har suður í Ukraina.
Tað upplýsir guvernørurin í økinum, Ivan Federov í morgun. Hann leggur aftrat, at hetta hendi í sonevnda Pologivskyj-økinum.
Guvernørurin veit at siga, at russar seinasta samdøgrið hava framt heili 357 álop á økir í Zaporizjzja-regiónini, har fólk búgva.
Sunnudagin skuldsetti Russland Ukraina fyri at hava lopið á kjarnorkuverkið í økinum við dronum.
Kjarnorkuverkið Zaporizjzja, sum verkið verður rópt, er størsta kjarnorkuverk í Evropa, og verkið hevur verið undir russiskum ræði síðan á vári 2022.
Russar siga, at álopið gjørdi skaða á ein bygning, sum rúmar einum av teimum seks reaktorunum, men trygdin á verkinum er ikki í vanda.
Leiðarin fyri altjóða kjarnorkustovnin (IAEA), Rafael Grossi, sigur, at hetta er ein álvarslig hending, og stovnurin hevur eftirlitsfólk við verkið.
Tað er tíðindastovan NTB, sum ber hesi tíðindi í morgun.