Millum 1800 og 1900 atgongumerki eru seld til konsertina hjá poppbólkinum Creamy í Runavík.
Og nú eru fleiri atgongumerki ikki at fáa.
Hálvføroyski bólkurin, sum syngur danskar barnasangir, hevur góðan byr í Føroyum.
Fløgan hjá teimum hevur verið millum tær mest seldu seinasta hálva árið, og í útvarpinum hevur nógv verið at hoyrt til sangirnar á fløguni.
Nú vísir sølan av atgongumerkjum eisini, at føroysku børnini hava tikið undir við lívliga danska barnapoppinum, sum hevur selt eini 200.000 eintøk í Danmark.
Ítróttarhøllin í Runavík tekur 2000 fólk, men fyrireikararnir ? Kappróðrarfelagið NSÍ ? hava valt at steðga søluni, nú millum 1800 og 1900 atgongumerki eru seld.
Konsertin, sum verður leygardagin 12. februar, er tann einasta á skránni. Ætlanin var eisini at hava eina konsert í Havn, men hendan varð strikað.
Nú verður aftur tosað um at hava hesa konsertina, men partarnir samráðast í løtuni um, hvat tað skal hava við sær av meirútreiðslum.
Um ein semja kann gerast um treytirnar fyri eini eykakonsert, verður hendan helst í ítróttarhøllini á Hálsi sunnudagin 13. februar.
