Fótbóltur
Talan var um trý nýggj nøvn, sum Jógvan Martin Olsen hevði á listanum, tá hann í morgun almannakunngjørdi, hvørjar 18 spælarar hann hevur við sær, tá fótbóltslandsliðið tann 4. juni fer til Estlands, har venjingardystur er á skránni.
Fortreytirnar hjá Jógvan Martini vóur, at Mikkjal Thomassen og Ingi Højsted vóru úti við skaða, meðan Jón Rói Jacobsen er upptikin av lestri, og tí skuldu onkur nýggj nøvn á listan.
Og sambært venjaranum, so var alt annað enn lætt at finna hesi.
- Tað er sjáldan, at eg havi havt so trupult við at seta navn á hópin. Eina mest tí ov nógvir av spælarunum, sum vanliga eru í myndini, ikki hava staðið seg serliga væl. Í so máta vísir tað væl støðuna, at ein spælari sum Øssur er ein av teimum, sum í størstan mun hevur sýnt tær dygdir, sum eg leiti eftir, segði Jógvan Martin Olsen millum annað.
Hartil iðraði hann seg ikki sørt um, at Jón Rói noyddist at geva avboð.
- Eg hevði vónað, at eg nú kundi spæla hann og Fróða Benjaminsen betur saman í verjuni, men tað verður so ikki í hesum dystinum, at eg havi tann møguleikan, kundi hann bara staðfesta.
Av nýggju monnunum var Høgni Madsen helst tann, sum tók størstu yvirskriftirnar. Fuglfirðingurin hevur staðið sterkur í myndini í ár, men hann hevur ongan tíð áður verið nevndur sum seriøsur biðil til eitt pláss á landsliðnum. Har hevur Áki Petersen hinvegin verið havdur á munni onkratíð, eins og Jónas Tór Næs nú í meira enn eitt ár hevur bankað hampuliga hart á dyrnar.
Men samanumtikið ein úttøka, sum í stóran mun eisini er eitt veldugt heraklapp til ÍF og tað avrik, sum teir hava sýnt fyrstu sjey umførini av Formula-deildini.
---
Fakta
Landsliðshópurin
Málmenn
Jákup Mikkelsen, KÍ
René Tórgarð, EB/Streymur
Verjuspælarar
Fróði Benjaminsen, HB
Jóhan T. Davidsen, NSÍ
Jónas T. Næs, Køge
Einar Hansen, NSÍ
Herbert í Lon Jacobsen, B36
Áki Petersen, ÍF
Miðvallarar
Jákup á Borg, HB
Símun Samuelsen, Keflavík
Høgni Madsen, ÍF
Súni Olsen, Viborg
Tem Hansen, Lyngby
Atli Danielsen, Frem
Áleyparar
Rógvi Jacobsen, Hødd
Christian Høgni Jacobsen, HB
Arnbjørn Hansen, EB/Streymur
Christian Lamhauge Holst, Lyngby
