Seinnapartin í gjár fekk Gønlands Politi eina fráboðan um, at ein persónur var funnin deyður í einari íbúð í grønlendska býnum, Tasiilaq.
- Løgreglan fór á staðið og við støði í sporum, sum løgreglan fann á staðnum, verður málið nú kannað sum drápsmál, sigur Grønlands Politi í tíðindaskrivi.
Í íbúðini fann løgreglan ein 48 ára gamlan mann, sum var deyður. Ein 41 ára gomul kvinna er handtikin og skuldsett í málinum. Tey bæði høvdu tætt samband.
Grønlands Politi kannar málið víðari, og løgreglan fær eisini hjálp úr Danmark í kanningararbeiðnum.
- Kanningarnar skulu gera av, um grundarlag er fyri at føra hina 41 ára gomul til grundlógaravhoyr í málinum, sigur Grønlands Politi.
Sermitsiaq skrivar, at hetta er annað málið av slíkum ólukkuligum slag í Eysturgrønlandi eftir fáum døgum.
Leygardagin hin 1. januar fekk løgreglan eisini fráboðan um eitt møguligt dráp í lítlu fiski-og veiðimannabygdini, Sermiligaaq nær við Tasiilaq.
Í Sermiligaaq var tað ein 42 ára gamal maður, sum varð funnin deyður - og ein 18 ára gamal maður er varðhaldsfongslaður, skuldsettur fyri dráp.
