Limir í formansskapinum í Norðurlandaráðnum luttóku í gjár á fyrsta fundinum hjá norðurlendsku samstarvsráðharrunum. Á skránni var ein avgerandi raðfesting undir danska og føroyska formansskapinum í Norðurlendska Ráðharraráðnum og í Norðurlandaráðnum: at dagføra Helsingfors-sáttmálan.
Ráðharrar úr Danmark, Finnlandi, Føroyum, Grønlandi, Íslandi, Noregi, Svøríki og Álandi umrøddu eina møguliga endurskoðan av sáttmálanum, sum hevur myndað karmarnar um almenna norðurlendska samstarvið síðani 1962 og seinast varð broyttur í 1996. Endamálið er at dagføra og nútímansgera sáttmálan.
– Vit eru til reiðar at stuðla aktivt soleiðis, at vit saman kunnu tryggja eitt sterkt og dagført norðurlendskt samstarv, sigur Ville Väyrynen, forseti í Norðurlandaráðnum. Og hann heldur fram:
– Vit fegnast um, at stjórnirnar hava lurtað eftir einmæltu áheitanini hjá Norðurlandaráðnum um at dagføra Helsingfors-sáttmálan. Hetta er eitt týdningarmikið og tíðarhóskandi stig. Sáttmálin varð seinast dagførdur fyri 30 árum síðani, og í dag hava talgildgerð, veðurlag, marknaforðingar, verju-, neyð- og trygdarpolitikkur nógv størri pláss í norðurlendskum samstarvi, sigur hann.
Ville Väyrynen leggur dent á, at Norðurlond hava ein einastandandi møguleika at endurnýggja samstarvið fyri tey átta londini í økinum.
– Norðurlandaráðið hevur einmælt heitt á stjórnirnar um at seta á stovn eina norðurlendska kommissión við uppgávu at leggja fram ítøkilig uppskot um nútímansgerð – og vit vænta at vera við í arbeiðinum. Vit eru til reiðar at stuðla aktivt, so vit í felag kunnu tryggja eitt sterkt og dagført norðurlendskt samstarv, sigur hann.
Norðurlandaráðið sær fram til víðari arbeiðið og eitt tætt samskifti við stjórnirnar um tilgongdina, sigur hann.
Á fundinum greiddi forsetin eisini frá um formansskránna hjá Finnlandi og Álandi fyri 2026 og um uppskot hjá Norðurlandaráðnum í fíggjarætlanina hjá Norðurlendska Ráðharraráðnum fyri 2027.
