Franz Beckenbauer er deyður 78 ára gamal. Tað boðar familjan frá í dag. Hann verður mettur sum ein av mætastu fótbóltsspælarunum nakrantíð. Hann er ein legenda í Týslandi, har hann hevur vunnið HM sum bæði spælari og venjari.
Týski verjuspælarin vann fimm týsk meistaraheiti. Fýra av teimum við Bayern München, har hann spældi 582 dystir, og eitt við Hamburger SV. Hann vann eisini European Cup tríggjar ferðir. Í 1974, 1975 og 1976. Tað bleiv til 103 landsydstir og 14 mál á týska landsliðnum sum spælari. Hann vann EM í 1972 og HM í 1974. Hartil vann verjuspælarin Ballon d’Or í bæði 1972 og 1976.
Tey flestu munnu seta Franz Beckenbauer í samband við ”libero” leiklutin á vøllin. Í dag er einki óvanligt, at síggja ein verjuspælara við góðum bóltførleika flyta seg fram á miðjuna og stýra spælinum. Franz Beckenbauer verður ognskrivaður at hava uppfunnið leiklutin.
Seinni bleiv hann eisini týskur landsliðsvenjari og vann HM í 1990. Bara tríggir mans hava megnað at vunnið HM sum spælarar og venjarar. Mario Zagallo (Brasil), sum doyði fyri kortum, Didier Deschamps (Frakland) og Franz Beckenbauer.
##med2##
Franz Beckenbauer bleiv seinni venjari, síðani forseti og heiðurslimur í Bayern München. Hann bleiv bara kallður fyri ”Der Kaiser”, Keisarin.
