Føroyska U18-kvinnulandsliðið í hondbólti hevur fingið ein stóran og óvæntaðan møguleika at taka lut í HM-endaspælinum, ið verður avgreitt í Norðurmakedonia millum 30. juli og 10. august.
Føroysku U18-kvinnurnar hava fingið tað sum á altjóða ítróttarmáli eitur eitt "Wild Card".
Heimasíðan hsf.fo skrivar soleiðis: - "Føroysku kvinnurnar vóru upprunaliga ikki kvalifiseraðar til kappingina, men við tað at Russland er útihýst úr altjóða hondbólti í løtuni, og at korona hevur argað undankappingar uttanfyri Europa, er Føroyar næst í røðini nú HM-plássini skuldu gerðast upp.
Føroyska U18-kvinnurnar stóðu seg somikið væl til EHF Championship kappingina í Georgia í 2021, har tær gjørdust nummar 3, at HM-plássið nú fellur í teirra lut. Tað var upprunaliga bert vinnarin av hesari kappingini, sum vann seg til HM, meðan nr. 2 skuldi spæla um HM-pláss móti liðið úr øðrum bólki í EHF-Championship kappingini. Nú er greitt at triðja landi í røðini eisini sleppur til HM.
Føroyska liðið spældi í EHF Championship kappingini javnleik móti Serbia, sigraði síðani á Estlandi og Italia í innleiðandi bólkaspælinum. Føroyska liðið tapti síðani hálvfinaluna tepurt fyri Hollandi, hareftir at liðið vann dystin um triðja plássið móti Ukraina. Hesin sigurin hevur nú víst seg at vera avgerandi í, at liðið nú skal til HM.
Hetta er aðru ferð í føroyskari hondbólssøgu, at Føroyar skal til eitt HM-endaspæl. Fyrru ferð var í 2017, tá føroysku U21-mennirnir vunnu seg til HM í Algeria, har teir gjørdist nr. 16 av 24 liðum.
Føroyar hevur nú trý ungdómslandslið, sum skulu kappast á ovastu rók í summar. U18- og U20-menn skulu til EM-endaspælið í ávikavist Montenegro og Portugal og nú U18-kvinnurnar eisini til HM-endaspælið í Norðurmakedonia.
Lutakastið til U18 HM-endaspælið verður 3. juni." Skrivar hsf.fo.
