Vøllurin við Djúpumýru verður aftur karmur um U21-landsdyst, tá Serbia kemur á vitjan.

- Nú ber til at ogna sær atgongumerki til U21-landsdystirnar móti Ukraina og Serbia, sum vera ávikavist 1. og 7. juni, skrivar Fótbóltssambandið.

Mikudagin 1. juni fer føroyska U21-landsliðið á vøllin aftur, tá ukrainar koma á vitjan á Tórsvølli. Og eina lítla viku seinni, týsdagin 7. juni, er heimadysturin móti Serbia á skránni. Dysturin millum Føroyar og Serbia verður spældur við Djúpumýru í Klaksvík.

Tá liðini hittust í fjør, vunnu ukrainar 1-0 á heimavølli, meðan dysturin millum Serbia og Føroyar endaði við málleysum javnleiki.

- Atgongumerkjasølan til nevndu dystir er byrjað, og fer fram í Nethandilinum á heimasíðuni hjá FSF. Kostnaðurin er 95 kr. fyri vaksin, meðan tað er ókeypis atgongd fyri børn og ung, 16 ár og yngri, skrivar FSF.fo.

Støðan í bólkinum er tann, at Frakland er fremst við 19 stigum fyri 7 dystir. Ukraina er nummar 2 við 13 stigum eftir 6 dystir, og á 3. og 4. plássi koma Serbia og Føroyar við ávikavist 11 og 9 stigum fyri 8 dystir. Norðurmakedónia hevur 6 stig, og hevur eisini spælt 8 dystir, meðan Armenia er aftast við trimum stigum fyri 7 dystir.

Mikudagin 1. juni kl. 18:00:

Føroyar U21 – Ukraina U21 á Tórsvølli

Týsdagin 7. juni kl. 16:15:

Føroyar U21 – Serbia U21 við Djúpumýru í Klaksvík