Wagner-bólkurin verður ofta róptur privati herurin hjá russiska forsetanum, Vladimir Putin.
Sambært guvernørinum í Luhans-regiónini, Serhij Hajdaj, hevur tað eydnast ukrainska herinum at oyðileggja eina av støðunum hjá Wagner-bólkinum í býnum, Kadijivka.
Heilt síðan 2014, tá Russland tók ukrainsku Krim-hálvoynna í Svartahavinum, hevur býurin har eysturin í Ukraina verið í valdinum hjá russiskum loysingarfólkum.
- Eldur kom í støðina hjá Wagner-bólkinum, skrivar guvernørurin á Telegram, sum eisini hevur lagt filmsbrot út á netið av bygningi í ljósum loga.
Newsweek, sum er ein av miðlunum, ið hava skrivað um ukrainska álopið, sigur, at tey hava verið í samband við russiskar myndugleikar, men her vil eingin vátta tíðindini.
Ukrainska netávísin, Hromadske, skrivar við keldum í lokalum miðlum í økinum, at 22 Wagner-hermenn lótu lív í álopinum og fýra vórðu særdir.
Myndir, sum hava verið at sæð í lokalum miðlum, vísa, at økið, har Wagner-bólkurin skal hava havt støð, liggur í sori.
Hin 28. mars skrivaði bretska verjumálaráðið, at Wagner-bólkurin hjálpr Russlandi við krígsførsluni í Ukraina.
- Orsakað av stórum tapum og stagnatión í russisku krígsførsluni, hava russar helst kent seg noyddar at biðið um hjálp frá Wagner-hermonnum, skriva útlendskir miðlar í kvøld.
