FJØLMIÐLAR
Gerhard Lognberg, javnaðartingmaður, fýlist á, at Útvarpið ikki hevði minningarorð um fyrrverandi partamannin, Jógvan Adolf Johannesen, sála, sum andaðist herfyri.
Hetta skrivar Gerhard Lognberg í minningarorði um Jógvan Adolf Johannesen í bløðunum í gjár.
Men sambært Jógvani Jespersen, kringvarpsstjóra, er tað ikki av tilvild, at Útvarpið ikki hevði heitt á nakran uttanífrá at halda minningarorð um Jógvan Adolf Johannesen.
- Vit hava havt ta skipan, at vit hava havt minningarorð um fólk, sum hava sitið í Løgtinginum ella í Landsstýrinum, sigur Jógvan Jespersen, og leggur afturat, at hetta hevur galdani uttan mun til, um fólkini hava sitið stutt ella leingi sum fólkavald.
Kringvarpsstjórin sigur tó, at tey nú hildu, at tíðin var farin frá hesum, og ístaðin hava tey valt at hava umrøður av fólkum, sum eru farin, í tíðindasendingunum. Hetta kann eisini umfata persónar, sum hava verið markantir á annan hátt í samfelagnum enn at hava tikið lut í politikki.
Sjónvarpið gjørdi tað sama
- Vit hava altso broytt tað til, at vit eru farin frá einum minningarorði, sum onkur annar helt, til at umrøða viðkomandi, greiðir Jógvan Jespersen frá og minnir á, at ta fyrstu tíðina hevði Sjónvarpið eisini minningarorð um politikarar, ið ikki longur vóru okkara millum, men at hetta síðani varð umskipað, so at umrøður komu ístaðin.
Jógvan Jespersen viðgongur tó, at tey høvdu ikki varnast beinanvegin, at Jógvan Adolf Johannesen var farin, og tí var umrøðan ikki fyrr enn tann dagin, jarðarferðin var.
Fyrsti politikarin, ið varð umrøddur eftir at nýggja skipanin kom í gildi í Útvarpinum, var Karolina Petersen, sála, ið var fyrrverandi landsstýriskvinna. Hon andaðist 11. oktober í fjør.
