Føroyski leikluturin í A – bólkinum í EM endaspælinum fyri U-20 menn í Porto í Portugal er av á hesum sinni. Í dag spældu Føroyar ímóti Ungarn, sum vísti seg at vera øgiliga stórur biti. Serliga var tað í fyrra hálvleiki, at tað ikki gekk eftir vild. Hálvleiksstøðan var 19 – 8, og úrslitið var 40 – 21. Nú skulu Føroyar spæla í B – bólkinum. Tað verður ímóti Noregi og Póllandi. Fyrri dysturin verður týsdagin og tann seinni mikudagin. Seinni í dag verður tað greitt, hvat mótstøðuliðið verður týsdagin og mikudagin.
Fyrstu løtuna í dag bendi einki á, at talan fór at verða um stórt skrædl. Men frá tí, at støðan var 4 – 4, var tað øgiliga langt millum føroysku málini. Føroyar royndu seg í løtum við sjey ímóti seks, men tað riggaði ikki, og mótstøðumenninir vóru skjótir at gera sær dælt av støðuni. Avrikið var væl lakari, enn tað hevur verið í tveimum teimum fyrru dystunum, og tað var stórur saknur, at Elias Ellefsen á Skipagøtu ikki var við.
Ungverjarnir høvdu lisið væl uppá og vóru harvið fyrireikaðir, nú teir høvdu sæð Føroyar vinna ímóti Danmark við einum máli og tapa við einum máli ímóti Slovenia. Mótstøðumenninir vóru stórir og sterkir og torførir at halda burtur frá møguleikum.
Í seinna hálvleiki gekk tað frægari hjá føroyska liðnum, sum vísti seg at vera væl fyri í úthaldni, hóast hetta var triði dysturin síðani hósdagin. Tað sá leingi út til, at málmunurin í seinna hálvleiki fór at verða lítil og eingin, men í heilt nógvum góðum støðum sendu føroyingarnir bóltin í stólpan, og so bjargaði ungverski málverjin sera væl.
Í seinna hálvleiki vóru fleiri av teimum, sum ikki hava verið so nógv við í teimum báðu fyrru dystunum, á vøllinum, og 18 ára gamli Rói Ellefsen á Skipagøtu var sera eyðsýndur og toppskjútti við fimm málum og kosin at vera besti føroyski spælarin.
-
Ungarn – Føroyar 40 – 21 (19 – 8)
Rói Ellefsen á Skipagøtu 5
Bjarni í Swelvindi 4
Óli Mittún 3
Hákun West av Teigum 3
Pauli Mittún 2
Janus Dam Djurhuus 1
Hanus Arason 1
Sakir Tróndarson Frýdal 1
Viktor Gaini 1
Baldur Gillason
Bogi Hansen
Sveinur Olafsson
Ovi Lützen
Elias Ellefsen á Skipagøtu
Málverjar
Pauli Jacobsen
Alexandar Lacok
Venjarar
Mark Lausen Marcher og Julian Johansen
Aðrir á beinkinum
Jens á Skipagøtu og Ári Jógvansson Olsen
