Ein ungdómsvenjari hjá HB ávarar nú um, at umstøðurnar hjá børnum og ungum í HB ikki eru nóg tryggar.
- Tað, sum ikki mátti henda, er nú hent, skrivar Pætur Niclasen, ungdómsvenjari.
Hann sigur, at ein maður er meldaður fyri at hava gjørt seg inn á ein drong, sum venur við ungdómsliðið hjá HB.
- Tá tey ungu eru ið Gundadali, hevur HB ábyrd av teimum, og hesa ábyrd hava vit ikki tikið í nóg stórari álvara. Tíverri, sigur Pætur Niclasen.
Hetta skrivar hann á Facebook bólkum hjá ungdómsliðum og venjarum hjá HB.
- Eg skal umbera yvirfyri foreldrunum hjá hesum drongi, at vit hava svikið okkara ábyrd at hava tryggar karmar um børnini, tá tey eru í HB húsinum, sigur Pætur Niclasen.
Jón Klein Olsen, varapolitiinspektørur váttar, at løgreglan í løtuni kannar ein mann fyri at hava gjørt seg inn á ein drong.
- Eg kann ikki siga nakað um hesa ítøkiligu støðuna, men eg kann vátta, at løgreglan í løtuni kannar eitt mál um siðamisbrot, sigur Jón Klen Olsen.
MYND: tilvildarlig
