USA ætlar at gera Ukraina út við eina framkomnari rakettskipan ímóti loftálopum, sum er ment í Noreg, skrivar tíðindastovan AP, sum vísir til eina ónevnda keldu nærindis avgerðini.
Joe Biden, forseti, fer sambært kelduni hjá AP at almannakunngera avgerðina á G7-toppfundi í Elmau í Týsklandi.
Í eini videorøðu fyri G7-londini verður roknað við at ukrainski forsetin, Volodymyr Zelenskyj, fer at biða um tung vápn frá Nato-londunum.
Framkomna loftverjuskipanin skal vera skipanin Nasams, sum er ment av norska Kongsberg Gruppe, og sum er framleidd í samstarvi við amerikanska Reytheon.
Nasams verður eitt nú nýtt av USA til at verja loftrúmið kring Hvítu Húsini og Kongressina í Washington.
Tað er ein flytbar loftverjuskipan fyri miðberandi rakettir, sum eru settar í samband við ein radara og ein eftirlitsvogn. Tá hóttanir úr luftini verða fangaðar, verða ein ella fleiri Amraam-rakettir av sær sjálvum sendar út ímóti málinum.
Skipanin verður mett at vera ógvuliga framkomin og kann verða týdningarmikil fyri verjuna hjá Ukraina ímóti loftálopum.
Amraam-rakettirnar eru mentar av Raytheon og kunnu bæði nýtast sum jørð-til-luft-rakettir og sum luft-til-luft-rakettir frá flogførum.
/ritzau/NTB