Størsta partin av árinum hevur Víkingur verið topplið. Fyri einari viku síðani tók NSÍ toppinum. Í uppgerðini sást, at Víkingur hevði spælt ein dyst færri enn NSÍ.
Í kvøld hevði NSÍ frí, meðan Víkingur var í høvuðsstaðnum og á Hoyvíksvølli vann sannførandi 5-1 sigur ímóti longu niðurflutta FC Hoyvík.
Sigurin ber við sær, at Víkingur nú er topplið við 52 stigum og er tvey stig frammanfyri NSÍ.
Stóri málskjúttin hjá Víkingi í kvøld var Martin Klein Joensen, sum skoraði trý mál. Sveinur Justinussen setti hol á, tá ið 20 minuttir vóru farnir, og sjey minuttir undan steðginum økti Elias Lervig um munin til 2-0.
Martin Klein Joensen økti til 3-0 og 4-0 tíðliga í seinna hálvleiki. Ein spælari hjá FC Hoyvík, sum eitur Tróndur Arge, minkaði um munin til 4-1, og Martin Klein Joensen staðfesti sigurin og hattrikkið, tá ið tað restaðu 12 minuttir.
Martin Klein Joensen er toppskjútti hjá Víkingi við tíggju málum.
Í tølunum var munurin ikki so stórur. FC Hoyvík vann tíggju hornaspørk, og Víkingur vann seks hornaspørk.
Víkingur hevði átta royndir á FC Hoyvík málið, og FC Hoyvík hevði fimm royndir á málið hjá Víkingi.
Leygardagin fær Víkingur vitjan av AB, og FC Hoyvík skal inn á Svangaskarð.
