Sum skilst, so hava Víkingur og HB gjørt eina avtalu um, at Heðin Hansen komandi kappingarár spælir við HB. Hann hevur annars sáttmála við Víking fyri 2017.
Les eisini: HB vildi hava Heðin longu í 2015
Tað hevur leingi ljóðað, at Heðin Hansen er á veg til HB. Hann hevur øll árini spælt við Víkingi, men hevur seinnu árini búð í Havn og tí koyrt til venjing í Gøtu.
Sum skilst, so hevur HB leingi roynt at fingið av avtalu í lag við Víking, sum í fjør vann FM. Tað hevur nú eydnast og eftir øllum at døma, so skiftir miðvallarin til HB.
Heðin Hansen var í Gundadali í gjár, tá HB spældi venjingardyst móti KÍ. Sambært Norðlýsinum, sum eisini hevur sett Heðin Hansen í samband við HB, so spældi Heðin Hansen ikki við, tá Víkingur í gjár spældi venjingardyst móti Skála.
Heðin Hansen er 23 ára gamal og spælir á miðjuni. Hann var í fjør við til at vinna FM við Víkingi, men spældi ikki altíð frá byrjan. Hann tók lut í 23 av 27 dystum í landskappingini, men í 16 av teimum bleiv hann skiftur út ella inn í dystinum.
