Í morgun skrivaðu Bjarni Prior, borgarstjóri í Vága kommunu og Vígdis Skorheim, leiðari fyri MEA undir samstarvsavtalu.
- Samstarvsavtalan gevur foreldrum og børnum teirra amboð og hjálp at styrkja um familjulívið. Avtalan er eitt víðkað tilboð til borgarar í Vága kommunu, sum eisini eru fevndir av avtaluni millum Almannaráðið og MEA, har øll pør, ið gerast foreldur fyri fyrstu ferð, fáa ókeypis parskeið.
Tað siga tey í Vága kommunu í dag.
Lagt verður aftrat, at avtalan gevur møguleika fyri at:
* Øll foreldrapør í kommununi, sum hava børn við tørvi, kunnu tekna seg til PREP-skeið ókeypis.
* Øll foreldrapør í kommununi kunnu tekna seg til KIFF-skeið ókeypis.
* Allar familjur í kommununi hava møguleika at fáa fimm tímar ókeypis familjuráðgeving.
PREP stendur fyri Prevention and Relationship Enhancement ella leysliga týtt, Praktiskur reiðskapur til eitt enn betri parlag.
- KIFF-skeiðið er til foreldur, sum eru farin frá hvørjum øðrum, men gjarna vilja styrkja samstarvið um felags børn.
Í Vága kommunu siga tey, at um undirtøkan verður nóg stór, verður miðjað eftir at skipa fyri skeiðum í Vágum.
- Tey, sum ynskja at gera brúk av avtaluni, kunnu ringja ella skriva beinleiðis til MEA á telefon 224921 ella [email protected]. Vit fáa hagtøl frá MEA um hvussu nógv taka av tilboðnum, men vit fáa ikki at vita, hvør hevur luttikið, siga tey í Vága kommunu.
Samstarvsavtalan millum partarnar er galdandi frá 1. januar 2023 at rokna og eitt ár fram.
