Í Degi og Viku týskvøldið 20. juni segði Jógvan á Lakjuni, landsstýrismaður, at hendan samgongan hevði nýtt 250 mió. kr. til at byggja miðnámsskúlar fyri.? ?Fari tí at biða Jógvan á Lakjuni um at leggja fram prógv fyri hesum uppáhaldi. Hvar og hvussu hevur sitandi samgonga nýtt 250 milliónir til miðnámsskúlabygging síðani hon tók við – altso frá februar 2004 til januar 2008?? ?Somuleiðis fari eg at biða landstýrismannin vátta ella avsanna hesar upplýsingar:?
Er tað rætt, at lógaruppskot til útbyggingar av øllum miðnámsskúlunum lógu klár, áðrenn Jógvan á Lakjuni tók við sum landsstýrismaður í 2004?
Er tað rætt, at eitt liðugt álit og uppskot um skúladepil í Marknagili fyri Studentaskúla, Tekniska Skúla og Handilsskúla varð gjørt í undanfarnu samgongu, har allar skúlaleiðslur tóku lut og vóru samdar?
Er tað rætt, at politisk semja var um at fremja hetta beinanvegin – eisini frá Fólkaflokkinum, og at byrjast skuldi í 2004 – og at verklagslógin lá klár?
Er tað rætt, at Tjóðveldi longu í 2004 legði hetta uppskotið um skúladepil við studentaskúla fyri tingið í hesum valskeiðnum og einaferð enn í 2006, men at tað varð felt í báðum førum?
Er tað rætt, at um tingfólk stóðu frítt, so var stórur meiriluti fyri uppskotinum, men einstakir tingmenn blokera málið í samgonguni?
Er tað rætt, at Jógvan á Lakjuni ístaðin hevur lagt uppskot fram um (sum samgongan hevur samtykt), at Føroya Handilskúli og Tekniski Skúli skulu taka lán til at byggja hølir í Marknagili, har landið skal rinda rentur og avdráttir – og at hetta kostar landskassanum 60 milliónir krónur eyka í rentum, heldur enn at fíggja tað yvir fíggjarlógina?
Er tað rætt, at byggingin av hesi lánsfíggjaðu verkætlan í Marknagili ikki er byrjað?
Er tað rætt, at Jógvan á Lakjuni legði uppskotið fram, har longu byrjaði Miðnámsskúlin í Vági varð støðgaður av samgonguni – hóast hann var samtyktur og annars hevði staðið liðugur í 2006?
Er tað rætt at henda avgerð hevur kostað landskassanum nógvar eyka milliónir til fánýtis – og skúlaungdómi í Suðuroy nógv mist ár við góðum skúlakørmum?
Er tað rætt, at støðgingin og útsetingin hjá landsstýrinum av skúlabygging hevur stóran eykakostnað fyri skattgjaldaran við sær, tí at byggikostnaðurin er vaksin almikið í bíðitíðini – orsakað av einum óstýrdum búskaparpolitikki frá sama landsstýri?
Og at enda: Heldur Jógvan á Lakjuni, at tað er í samsvari við sannleikan, tá hann vil vera við, at henda samgongan hevur loyst trupulleikaranar hjá miðnámsskúlunum – og at nú er bara Hoydalar eftir?? ?Ella telur tað eisini við sum loysnir at støðga og forhála skúlabygging við stórum eykakostnaði fyri landið og mistum áhuga og ørkymlan hjá næmingum og starvsfólki?? ? ?
