Helena Debes Højgaard er 23 ár og úr Hoyvík. Hon hevur støddfrøðiliga studentsútbúgving úr Hoydølum frá 1996. Ynski hennara er at gerast tíðindakvinna, og tí valdi hon í september 1998 at fara á háskúlan í Kungälv, har hon gongur á fjølmiðladeildini. Á hesari deildini tekst hon mest við útvarp og at skriva.
Tá Helena skuldi velja sær eitt pláss at fara í starvsvenjing, var Útvarp Føroya ein upplagdur møguleiki. Hon byrjaði starvsvenjig sína í ÚF tann 8. mars, og dámdi henni stak væl at royna seg sum útvarpskvinna. Men verkfallið gjørdi, at tíðin hjá Helenu Debes Højgaard sum útvarpskvinna ikki gjørdist serliga drúgv - í hvussu so er ikki í fyrsta umfari. Manningin í Útvarpi Føroya eru øll limir í Starvsmannafelagnum, og vildi Helena ikki taka upp verkfallsrakt arbeiði, so hon mátti finna sær annað pláss at vera í starvsvenjing so leingi verkfallið varir. Helena Debes Højgaard er nú í starvsvenjing á Sosialinum. Hesum er hon ikki kedd av, hóast hon hevði ynskt at roynt seg sum útvarpskvinna. Hon sigur í staðin smílandi, at nú fær hon tvær flugur við eitt slag. Hon er nú nevniliga sloppin at royna seg innan tvey sløg av tíðindaflutningi - útvarpsarbeiði og blaðmannaarbeiði.
Tá starvsvenjingin er liðug tann 2. apríl, fer Helena aftur til Svøríkis at vera, fyribils til einaferð í mei. Fjølmiðlaskeiðið á Kungälv er 9 mánaðar langt, men verður helst í næstum víðkað til 2 ár.
