Lagið í tí fótbóltsøra norska býnum, Fredrikstad er framúr gott.
Fjórða dystin á rað í bestu norsku fótbóltdeildini eydnaðist tað Fredrikstad at fáa úrtøku. Í dag gjørdist talan um ein 1-0 sigur á heimavølli móti Sandefjord.
Sigursmálið skoraði Morten Bjørlo við einum vøkrum lobbi tá ein hálvur tími var leiktur av dystinum.
Brandur Hendriksson var á vøllinum fyri Fredrikstad teir seinastu 24 minuttirnar av dystinum.
HER ber til at síggja ein samandrátt av dystinum.
Telja vit dystirnar í steypakappingini við, so hevur liðið sum Mikkjal K. Thomassen er høvuðsvenjari hjá vunnið fýra dystir og hevur leikt tveir javnar seinastu seks dystirnar.
Komandi mikudag 1. maj, ið er frídagur í Noreg spælir Fredrikstad á heimavølli dyst móti stórliðnum, Rosenborg í triðja umfarinum í norsku steypakappingini.
Megnar Fredrikstad at vinna á Rosenborg hava teir vunnið seg í áttandapartsfinalurnar í steypakappingini.