Tað var ikki ein góður føroyingadagur í bestu íslendsku fótbóltsdeildini ígjár.
Báðir føroyingarnir hjá oddaliðnum, Vali, Kaj Leo í Bartalsstovu og Magnus Egilsson fingu ikki somikið sum ein minutt á vøllinum tá Valur vann 1-0 á KA á útivølli á Akureyri. Patrick Pedersen skoraði sigursmálið tá eitt lítið korter var eftir av dystinum.
Komandi sunnudag tekur Valur móti Fylkir.
Gunnar Nielsen vardi málið hjá FH, ið fekk ein ordans sekk á útivølli móti Breiðablik. Heimaliðið vann 4-0. Longu í steðginum var Breiðablik á odda 3-0.
Høvuðsvenjarin hjá FH, Logi Ólafsson tók avleiðingarnar av vánaligu gongdini, og Gunnar Nielsen og liðfelagarnir hava nú fingið nýggjan høvuðsvenjara. Nýggjur høvuðsvenjari hjá FH er Ólafur Jóhannesson.
Komandi sunnudag tekur FH móti KA á Kaplakrika leikvøllinum á Hafnarfirði.
HER ber til at síggja málini Gunnar Nielsen fekk ímóti sær í dystinum móti Breiðablik: https://www.visir.is/k/7a820cd4-395c-4768-aea6-14a8e0a67aad-1624264020790?jwsource=cl
| STØÐAN: | |||
| Valur | 10 dystir | 18:10 | 23 stig |
| Víkingur R. | 8 | 14:6 | 18 |
| KA | 8 | 13:4 | 16 |
| Breiðablik | 9 | 21:13 | 16 |
| KR | 8 | 14:9 | 14 |
| FH | 9 dystir | 13:14 | 11 stig |
| Fylkir | 9 | 13:16 | 10 |
| Stjarnan | 10 | 8:14 | 10 |
| Keflavík | 8 | 9:15 | 9 |
| Leiknir R. | 9 | 9:13 | 8 |
| HK | 9 | 10:17 | 6 |
| ÍA | 9 | 9:20 | 5 |
