Seinnapartin verður fyrsta oyggjauppgerðin í ár í Sarpugerði millum Víking og B68. Toftamenn hava tvær ferðir havt vitjan av Víkingi. Fyrru ferðina vann Víkingur 6-0. Tað var annan mai, og 13 dagar seinni endaði tað 2-2, tá ið Víkingur aftur var á Svangaskarði.
Higartil í ár hevur Víkingur tríggjar ferðir mist stig ímóti teimum, sum eru millum tey fimm niðaru á stigatalvuni. Umframt á Toftum hevur Víkingur tvær ferðir spælt javnt á útivølli ímóti EB/Streymi – málleysan javnleik í øðrum umfari og 1-1 fyri trimum vikum síðani.
Hjá Víkingi er liðformaðurin Atli Gregersen tøkur aftur, eftir at hann var leikbannaður í trivaliga 6-0 sigrinum síðsta sunnudag í Trongisvági. Signar á Brúnni er tøkur aftur eftir liðbandsskaða. Málverjin Bárður á Reynatrøð er framvegis skaddur, og so eru Ari Olsen og Finnur Justinussen langtíðarskaddir.
Síðsta sunnudag tapti B68 5-0 á heimavølli ímóti KÍ. Tá tók Steffan A. Løkin seg aftur stutt undan dystarbyrjan. Esmar P. Clementsen var ikki heima úr Danmark, har hann er í útbúgvingarørindum. Petur í Túni Petersen, Aleksandur Ó. Jensen og Helgi Johannesen eru skaddir.
