Visit Runavík heldur fram við fyrilestrarøðini um íverksetan og ferðavinnu. Næsti fyrilesturin røðini verður mánakvøldið 13. november, og tá er Heimablídni á skrá.
Súsanna Sørensen, marknaðarleiðari á Visit Faroe Islands, fer at greiða frá hugtakinum og tilboðnum, Heimablídni.
- Hvørji eru krøvini og reglurnar í sambandi við Heimablídni? Hvussu brúkar Visit Faroe Islands heimablídni í marknaðarføringini av Føroyum, og hvønn leiklut hevur heimablídni í nýggju ferðavinnustrategiini?
Næst á skrá er Harriet Olafsdóttir, íverkseti og bóndi. Hon fer at greiða frá sínum royndum – hvussu hon byrjaði, og hvussu gerandisdagurin sær út í dag.
- Súsanna og Harriet fara eisini at svara spurningum, siga tey hjá Visit Runavík.
Fyrilestrarnir verða á Bókasavninum við Løkin í Runavík, mánakvøldið 13. november klokkan 19-21, og teir eru ókeypis.
##med2##
Toymið á Visit Runavík hevur í rúma tíð arbeitt við at skipa staðbundnar verkætlanir innan ferðavinnu, har meginparturin av inntøkunum fer til bygdina, staðbundnar felagsskapir ella bygdafólkið.
- Vit miðja altíð eftir, at trivnaður og nøgdsemi eru í hásæti.
Toymið á Visit Runavík vónar, at onkur fyrilestur kann geva íblástur til fólk í Runavíkar kommunu at byrja eitt hvørt virksemi, so fleiri úr lokala økinum kunnu bjóða seg fram, tá talan er um staðbundnar upplivingar, gisting, vistveiting, heimablídni ella okkurt líknandi.
- Fleiri áhugaverdar og serstakar upplivingar eru longu í kommununi, men hetta er ein roynd at fáa fleiri at leggjast afturat, siga tey hjá Visit Runavík.
