Hóast landslæknin hevur mælt til tað, so er lítið, sum bendir á, at landsstýrið fer at seta í gildi reglur um koronupass, sum kann geva koppsettum fólki fyrimun at virka í samfelagnum.
Higartil hevur landsstýrið hildið fast um, at munur skal ikki gerast á fólki. Og tað endurtók Bárður Nielsen, løgmaður, í tíðindunum á FM í gjár. Og við Kringvarpið segði hann, at hendan avgerðin einki hevur við tað at gera, at ein av landsstýrismonnunum, Jenis av Rana, er í móti koppseting og alment hevur kunngjørt, at hann fer ikki at lata seg koppseta.
Kaj Leo Holm Johannesen, landsstýrismaður í heilsumálum sigur við in.fo, at hetta fyrst má viðgerast á landsstýrisfundi og vísir á, at landsstýrið higartil ikki hevur viljað gjørt mun á fólki, sum eru koppsett og teimum, sum ikki eru koppsett.
