Ingolf S. Olsen
”Føroyar hava eitt stórt potentiali sum ferðafólkaland. Fortreytin fyri at økja um talið av ferðandi er, at fólk kenna til landið og tær upplivingar, sum eru at fáa her. Tí er neyðugt við eini effektivari og hollari marknaðarføring av Føroyum.”
Soleiðis skrivaði Johan Dahl, vinnumálaráðharri, í kronikk í fyrstu útgávuni av Vinnublaðnum hjá Miðlahúsinum, sum kom út 30. januar í ár.
Og at hann meinar nakað við tað, ber hansara nýggjasta átak á ferðavinnuøkinum boð um. Eitt lógaruppskot um at geva landsstýrismanninum heimild at umskipa Ferðaráðið, Visit Faroe Islands, til eitt alment partafelag er nevniliga sent til hoyringar hjá ferðavinnuni, og endamálið við lógini er júst effektivisering av marknaðarføringini.
Um hetta sigur grein 2 í lógaruppskotinum:
§ 2. P/F Visit Faroe Islands hevur til endamáls at samskipa og marknaðarføra Føroyar sum ferðafólkaland til tess at skapa vøkstur innan føroyska ferðavinnu.
Niðurslitið álit
Men tað hevði sjálvsagt eisini borið til at hert marknaðarføringina, tó at Visit Faroe Islands var verðandi ein vanligur almennur stovnur.
So veruliga grundgevingin kemur í viðmerkingunum hjá landsstýrismanninum til lógaruppskotið. Her endurgevur hann sera rumblutu søguna hjá Ferðaráðnum, og niðurstøðan er ein ásannan av, at álitið hjá ferðavinnuni á politisku skipanina er slitið niður í legg, og almenna partafelagið skal verða amboðið at endurreisa hetta álitið.
Johan Dahl skrivar millum annað soleiðis í sínum viðmerkingum:
“Meldurkenda gongdin í Ferðavinnuni í Føroyum seinastu 30 árini (...), kann sigast at vera eyðkend av vantandi langskygdum ætlanum fyri ferðavinnuna í Føroyum. Nógvu politisku umskipanirnar av ferðavinn-uni hava máað av álitinum millum ferðavinnuna og politisku skipanina.
Tað er ein fortreyt fyri menning og vøkstri innan ferðavinnuna í Føroyum, at hetta álitið millum partarnar verður endurreist, og at Ferðaráðið verður lagt í tryggari og meiri støðugar karmar. Til tess at røkka hesum endamáli, eru partarnir samdir um, at tað er neyðugt at umskipa Ferðaráðið, m.a. soleiðis at frástøðan til politisku skipanina verður størri, og soleiðis at Ferðaráðið í størri mun kann leggja eina langtíðar marknaðarføringarætlan í samstarvi við vinnuna.”
Freistin hjá hoyringspørtunum at koma við viðmerkingum til lógaruppskotið hjá Johan Dahl er úti í dag, og síðani gongur neyvan long tíð, áðrenn hann ber uppskotið í tingið. Tí tað skal avgreiðast í hesi tingsetuni, tað er í vár, um umskipanin av Visit Faroe Islands til alment partafelag skal verað framd, áðrenn ferðafólkavertíðin í ár av álvara byrjar.
Lógruppskotið hjá vinnumálaráðharranum hevur kjølfesti í samgonguni, og sum tað sæst í øðrum greinum her í blaðnum, fær uppskotið neyvan nakra harða mótstøðu frá andstøðuni heldur.
