– Vit arbeiða við eini loysn, soleiðis at tað framvegis fer at bera til at selja vanliga blýfría bensinið, oktan 95.
Tað sigur Gunnar Nielsen, stjóri í oljufelagnum Effo.
Áhugafelagið hjá teimum, sum eiga ellisakfør í Føroyum, Føroya Ellisakfør, hevur í skrivi til oljufeløgini víst á trupulleikan av, at oljufeløgini í framtíðin bara fara at selja nýggja og meira umhvørvisvinarliga bensinið E10, sum ellisakør ikki kunnu brúka.
Flestu ellisakfør kunnu heldur ikki brúka vanliga blýfría bensinið, sum fæst í Føroyum, men við at seta blýggjtilsetning til, so ber til at brúka tað. Tað verður gjørt á tann hátt, at fyri hvønn litur av bensini, tú koyrir í tangan, so fer ein millilitur av blýggjtilsetningi. 

Myndin er ikki tøk

Gunnar Nielsen sigur, at oljufeløgini arbeiða við eini loysn. Men tað verður ikki soleiðis, at tað fer at bera til at keypa gamla bensinið á øllum bensinstøðunum kring landið, sigur hann.
– Men tað verður ein loysn við, at vit fara selja gamla bensinið á onkrum av goymslum okkara, sigur hann.
– Vit viðurkenna, at hetta er eitt afturstig fyri ellisakførini. Men hendan broytingin er neyðug, nú vit leggja um til meira umvhvørvisvinarliga brennievnið, sigur Gunnar Nielsen.
– Hann vissar tó um, at ellisakførini ikki verða slept upp á fjall. Vit koma við eini loysn, sigur hann.