16. mai í fjør var Kim W. Engstrøm uppsagdur sum høvuðsvenjari hjá HB aftaná bert 10 dystir í Betrideildini.
Eitt ár og ein mánað seinni hevur Kim W. Engstrøm vunnið sær uppflyting úr triðbestu donsku fótbóltsdeildini saman við søguríka felagnum í Keypmannahavn, B93.
B93 spældi javnleik 1-1 móti Thisted á søguríka leikvøllinum, Østerbro Stadion fyrr í dag. Javnleikurin var nóg mikið til at halda B93 á øðrum plássinum, ið gevur uppflyting.
Kolding og B93 endaðu bæði á 66 stigum og flyta upp í næstbestu deildina. Esbjerg endaði við svartaperi. Liðið úr Vesturjútlandi endaði á 65 stigum. Í Esbjerg har tey eru í fremstu røð í kvinnuhondbólti og í íshokki eru tey skelkaði av, at teirra fótbóltslið ikki megnar at vinna seg upp úr triðbestu deildini.
Hetta er fyrstu ferð í 18 ár, at B93 sleppur at royna seg í næstbestu donsku fótbóltsdeildini.
