Føroyska Jasmin er kanska tann seinasti vinnarin av donsku X-Factor kappingini.
Nú Danmarks Radio er liðugt at senda X-Factor sjeynda árið á rað, umhugsar leiðslan hvørt tey skulu halda fram við enn einum umfari, sum skal sendast fyrst í næsta ári, ella um punktum skal setast fyri kappingina.
X-Factor hevur øll árini havt nógvar hyggjarar, og næstseinasta fríggjakvøld, tá finalan var, hugdu eitt skifti tvær milliónir fólk.
- Nú eftirmeta vit kappingina, og vit hava ikki tikið nakra endaliga avgerð um framtíðina hjá X-Factor, sigur Rasmus Ladefoged, sum er undirhaldsleiðari í DR, við Politiken.
Atfinningar hava støðugt verið ímóti X-Factor kappingini, sum ikki verður hildin at hava nóg høgt støði, men spurningurin er, um DR torir at sløkkja fyri eini av mest sæddu sjónvarpssendingini í Danmark nakrantíð.
