Stutt eftir klokkan 15 í gjár hendi eitt ferðsluóhapp í Leirvík. Hetta var á vegnum móti tunnilsmunnanum til Norðoyatunnilin.
- Fráboðarin segði, at viðkomandi varð yvirhálaður og at bilførarin, sum yvirhálaði, hevði mist tamarhaldið á bilinum og var farin oman av vegnum.
Vaktleiðarin visti í morgun at siga, at bæði løgregla, sjúkrabilur og sløkkilið vórðu send á staðið, tá hetta ljóðaði nokso álvarsligt.
- Tá fráboðarin ringdi aftur, segði viðkomandi, at bilurin var farin niðan av vegnum og ikki oman av vegnum, og at førarin nú var komin úr bilinum.
Sambært vaktleiðaranum varð bilførarin sendur á Landssjúkrahúsið til kanningar, men eftir øllum at døma var hann sloppin rímiliga óskalaður.
- Bilurin fekk tó betýðiligan skrokkskaða, leggur vaktleiðarin aftrat. Einki framgongur um, at nøkur hálka var á vegnum, tá óhappið hendi.
