Ukrainski forsetin, Volodymyr Zelenskyj, lovar hevnd yvir Russland eftir loftálop í nátt har vesturi í Ukraina, sum raktu býin, Lviv.
Býurin liggur ikki langt frá markinum til grannalandið, Pólland.
Á Telegran rópar forsetin enn einaferð russar fyri yvirgangsmenn og sigur, at tíverri eru bæði deyð og løstað í álopinum, sum rakti íbúðarbygning í býnum.
- Vit fara definitivt at svara fíggindanum aftur, og svarið kemur at merkjast, sigur Volodymyr Zelenskyj í morgun.
Útlendskir miðlar vita í morgun at siga, at í minsta lagi fýra fólk eru deyð og átta løstað, eftir at ein russisk rakett rakti.
Guvernørurin í økinum, Maksym Kozytskyj, sigur á Telegram, at ein russisk rakett rakti íbúðarblokk í býnum.
Maksym Kozytskyj sigur, at eftir at rakettin hevði rakt, kom eldur í bygningin.
Tá guvernørurin legði sína fráboðan út á Telegram, vóru bjarfingarfólk í holt við at sløkkja eld og leita eftir deyðum og særdum í leivdunum.
Umleið 60 íbúðir og 50 bilar eru oyðiløgd í russiska álopinum í nátt.
##med2##
Guvernørurin sigur, at hann varð ávaraður um, at rakettir vóru á veg, og tí heitti hann eisini á fólk í býnum um at søkja sær skjól.
Eftir at loftávaringin fór í gongd í Lviv, hoyrdust fleiri spreingingar.
Lviv liggur bert 70 kiometrar úr pólska markinum.
Í nátt vóru loftávaringar um alt Ukraina, og sambært myndugleikunum í landinum vóru russiskar rakettir á veg móti fleiri býum, sum náttin leið.
Dagbladet og tíðindastovan NTB eru millum miðlarnar, sum bera hesi tíðindi í morgun.
